انتهى عام 2016 بأكمله بغمضة عين، وعدّت ساعتين من عام 2017...
عام 2016 كان بالنسبة لي مختلف عن أغلب اللي حواليا، بالرغم من إن العام ده فقدت فيه ناس كتير بعزهم وكانوا قريبين مني، وحصلت لي حاجات كتير صعبة، بس ده يعتبر أسعد وقت قضيته في حياتي الحمد لله😊
برغم كل الظروف الملخبطة اللي مريت بيها واللي ممكن تحبط أي حد، 2016 كان بالنسبة لي عام التوازن، عام التحدي لكل حاجة صعبة وتاعباني....
كنت دايمًا بعمل أخر كل سنة تقييم ليها، وأشوف أنا حققت فيها ايه؟ وأبدأ أكتب أحلام للسنة الجديدة، بس كنت ناسية حاجة مهمة هي ربنا...
إلى الله,
من غيرك كنت ضايعة، فاكرة إني عايشة صح وإني كده برضيك... يمكن أكون مش على أكمل وجه ظاهريًا، بس بحاول وأنت الأعلم، العام ده بالنسبة لي هو أكتر وقت عرفتك فيه حق المعرفة وقربت منك بجد، أول مرة كنت أحس إني دعواتي بتُستجاب عشان فقدت تعلقي بكل حاجة سواك ويقيني بك زاد، لما عرفتك كويس، عرفت أتصالح مع نفسي وعرفت أنا بجد عايزة ايه ومحتاجة ايه؟، حتى الحاجات الحلوة اللي كنت بعملها ومازلت الحمد لله بقت ليها طعم تاني أحلى عشان أنت بجد معايا وجنبي❤
مرة صديق ليا كنت بعيطله وقاعدة أتحايل عليه في حاجة عايزاها منه، قالي: الشكوى لغير الله مذلة.... ما عرفتش معناها صح غير الفترة اللي فاتت، ما بقيتش أطلب حاجة أنا عايزاها غير منك يارب وبس، وبقيت بشعر معاك بالأنس وإنك ملجأي وملاذي في الفرح والحزن....
لكل عيلتي وأصدقائي,
آسفة لو كنت اتقوقعت عنكم أو قصرت وبعدت، آسفة لو كنتوا محتاجيني في وقت وما لاقيتونيش جنبكم فيه... أنا بحبكم جدًا، وأكيد هنحقق مع بعض كل اللي بنحلم بيه وأكتر إن شاء الله الفترة الجاية😍😍
كل عام وإحنا كلنا بخير... كل عام وإحنا هنوصل ونحقق كل أحلامنا، ولما نقع هنقوم ونكمل إن شاء الله
😊😊#خواطر_العام_الجديد
